الموضوع منقول عن صفحة ايجيبشيان فوديز على الفيسبوك و الصور روعة بصراحة
للتعرف على احسن مطاعم مصر ادخل ع الصفحة
#فجع_نص_اليوم
#أكيلة_شبرا_الخيمة
أنا مش عارف بصراحة إزاي دي أول مره اجرب #أبو_الهنا صحيح احنا اتكلمنا عنه قبل كده مرتين بس دي تجربتي الشخصية الأولي هناك وبصراحة المكان يستحق أي كلمة اتقالت عنه قبل كده .. والجدير بالذكر إن التجربة دي كانت من تلات أيام الساعة خمسة الصبح والأكل طابق علي نفسي لغاية دلوقتي 😅
أهم حاجة في الموضوع هي الريش يا جماعة أنا ماشفتش الاختراع ده قبل كده ريش مستوية في اللية بعد كده بتنزل تاخد وش عالجريل عشان تطلع في الأخر حاجة في منتهي الاجرام طرية ودايبة زي الكتاب مابيقول ويمكن أكتر من الكتاب بشوية كمان.
جربنا بقي بقية الحاجات كلها تقريبا الكفتة هايلة برضو طعمها حلو فعلا, الكبدة والكلاوي ظريفة واللحمة رغم إنها مش ارفع حاجة في الدنيا لكن كانت طرية جدا خاصة اللي طالعة من الطاسة علي طول علي حسب نصيحة الدولي محمد صلاح .. المخاصي بقي طعمها مختلف عن أي مكان تاني ممكن متعجبش كل الناس بس أنا عجبتني عشان كانت خفيفة جدا فعاملتها معاملة التسالي كده ..
مفيش كلام كتير اقوله بصراحة ممكن افهم لو ناس الأكل هناك معجبهاش قوي عشان تتبيلتة خفيفة جداً معتمد اكتر علي اللحمة والطعم اللي جاي من اللية بس انا فعلا اتكيفت جدا من الأكل هناك ولازم اشكر الصديق العزيز محمد عماد الإنجباوى اللي طلعني الطلعة العظيمة دي ..
#الاسعار بقي الطلب بيتراوح من 50 ل 70 وهتلاقوا المنيو في آخر الصور.
#المواعيد اللي موضوع غريب قوي المكان فاتح 24 ساعة طول السنة المكان مش بيقفل خالص المطعم مالوش باب اصلا 😬 الرجل قالي احنا زي القسم مش بنقفل خالص.
#نصيحة اللي مش بيحب اللية والأكل التقيل قوي يبعد عن المكان ده خالص
#العنوان في شبرا الخيمة ميدان المؤسسة في وش قسم شرطة أول شبرا الخيمة إسألوا الناس هو معروف هناك جدا وده اللوكيشن عشان الوصول مش اسهل حاجة لو أنت مش من هناك:
تقييم وتصوير: إسلام سلامة
#EgyptianFoodies
No comments:
Post a Comment