حاجات الواحد اكتشفها لما كبر :
١- ان القعدة في البيت بالبيجامه أحسن من اجدعها خروجه.
٢- ان شنطة الخروج لا يمكن تخلي من اَي مسكن لزوم الصداع و كنترولوك لزوم الحموضة.
٣- ان النوم ده نعمة كبيرة فكرة ان الواحد يحط رأسه علي المخدة و ينام من غير قلق او الم.
٤- ان الصحاب مش بكترهم و فكره الشلة دي يعني حوارات كتير.
٥- ان مش كل حاجه تعبنا فيها كان ليها لزمه.
٦- ان عمرنا ما نحكم بالشكل ، العشرة و المواقف بس هي اللي بتبين.
٧- ان المعاتبة دي مجهود ذهني و نفسي جبار مايتعملش غير للناس العزاز و العزاز اوي كمان ، اما الباقي فابتسامة عريضه و بيتقالوا انت صح.
٨- ان الوقت و العمر اللي عدي مش هيجي اده فلازم يستغل عدل و من غير زعل و لا حرقة قلب علي حاجة او علي حد
٩- ان اللي ماوقفش جنبك في حزنك صعب يلاقي مكان في حياتك.
١٠- ان الواحد مايخدش كل حاجة علي أعصابه و ان الدنيا مش مستاهله.
لأن بجد في الاخر كله بيعدي و اللي بيفضل وش باين عليه الهم و شعر شاب بدري
No comments:
Post a Comment