بما أن هناك ٤٢ مسلسل جديد في رمضان هذا العام
و بما اني مشترك في قنوات اي ار تي و هناك فرصة لمشاهدة اغلب المسلسلات بدون فواصل
و على الرغم من شكاوي اغلب المشاهدين من طول الفواصل الإعلامية على كل القنوات المصرية المفتوحة الا ان هناك فوائد عديدة من طول و تكرار هذه الفواصل الإعلامية
اولا تخيل انك راجع تعبان قبل الفطار و الولاد فاتحين قناة ام بي سي مصر بيتفرجوا على تمثيلية خفة يد مثلا و انت لسه ما صلتش العصر لو التمثيلية شغالة على طول كده بدون فواصل و حتسلمك مباشرة لآذان المغرب و برنامج رامز تحت الصفر
لكن مع فاصل ام بي سي مصر الاعلاني ممكن تصلي العصر و الظهر و الفجر و المغرب و العشاء في فاصل واحد
مع أن الفاصل الاعلاني في ام بي سي الأم فاصل عادي جدا و زمان لما كانت تمثيلية عادل امام بتيجي على القناتين كانت بتخلص على ام بي سي العادية قبل مصر بنص ساعة
فيه واحد نزل و صلى العشاء و التراويح و رجع و لم يفته الا اغنية مدحت صالح بتاعت سامحني يابا في تمثيلية رحيم
قالك المشاهدة ع اليوتيوب احسن ايوه بس تخيل كده مراتك بتحضر الفطار و بتشوف تمثيلية لعنة كارما بتاعت هيفاء وهبي على نايل دراما قبل الفطار يعني حبكت هيفا قبل الفطار علشان لو فاضل لك تكة على الفطار بعد المترو و الشغل و الناس و الذي منه نتك لك التكوين تكمل صيامك ليه يعني
المهم المدام قاعدة مركزة مش انت خالص مع الست هيفاء عايزة تشوف الموضة أو ديكور جديد او طريقة مكياج جديدة ما هو المسلسل ده مافيهوش لا قصة و لا تمثيل مناظر بس
يبقى حضرتك و الولاد تجيبوا فطار من بره لان التمثيلية بتخلص مع اذان المغرب
لكن لو نفس التمثيلية على قناة بتجيب اعلانات كتير
المدام حتتفرج و تخلص الفطار في الفاصل الاعلاني
واحد صاحبي اخترع طريقة جديدة للتغلب على الاعلانات و ضعف النت و لسه البقباقة شغالة بيتفرج اتنين في واحد يعني يشوف رامز تحت الصفر مع ابو عمر المصري بتاعت احمد عز في نفس الوقت و مابيفوتهوش حاجة تقريبا ما نفس حركات رامز اتهرشت حلقة و تمثيلية عز زي اخواتها من باقي المسلسلات
و تخيل كده لو بتتفرج ثلاثة في واحد يعني تشوف رامز مع عوالم خفية مع ابو عمر المصري و برضه مش حيفوتك حاجة ما هو مسلسل عادل امام هو نفس المسلسل بقاله خمس سنين
شوفت الانجاز
طيب لو انت من المحظوظين زيي اللي لسه عيالهم بتمتحن !!!
في الحالة دي لا تلاتة في واحد و لا أربعة في واحد هو واحد بس و اكيد الواد و لا البنت حيحس بتأنيب الضمير و هو عمال يشوف نفس الاعلانات لمدة أكثر من نصف ساعة اكيد عنده دم و حيدخل يذاكر شوية اثناء الفاصل
طيب لو عايزين فول او زبادي على السحور ابعت الولاد و ماحدش حيعترض على الأقل حترحمه من الفاصل الاعلاني
طبعا في شهر رمضان الفاصل الاعلاني بيأصل عندك فضيلة الصبر
و انت قاعد لمدة نصف ساعة بتتفرج على إعلانات مشاريع عقارية سيسكنها نيمار و أمثاله عمرك ما حتشوفها لان حتى الخدامين حيجيبوهم من بره
و بتشوف سباق مجموعة من المسوقين في شركات الاتصالات و البنوك في كيفية القضاء على ميزانية التسويق في مؤسساتهم في اعلانات بلا هدف علشان ما يوفروش في الميزانية بتاعته السنة الجاية
الاعلانات بتوفرلك فرصة تختبر و تدرب ذاكرتك لما تشوف حتفرق اعلان اورانج من اتصالات ازاي مثلا و لسه البقبااقة شغالة
أو تفرق بين اعلان مصر الخير أو الاورمان أو كل المستشفيات و حتتعلم كظم الغيظ لما تعرف أن جزء من فلوس زمانك أو تبرعاتك بيروح لتمويل المسلسلات و البرامج الهادفة دي
ما هو الاعلانات في رمضان مش ببلاش حتى لو لمستشفى ٥٧ و بصوت الرجل العميق اللي بيقولها ده
المهم أن الفاصل الاعلاني بيعلمك الصبر و كظم الغيظ و بيديك فرصة تصلي و تعمل كل اللي بيتك محتاجه في رمضان
مش عارف ازاي ممكن اعيش من غير فواصل إعلانية في القنوات المصرية
No comments:
Post a Comment